IT四大頭

I記買唔成太陽，O記執咗個熱煎堆。以前O記同埋太陽曾合作無間，特別係電訊商買親資料庫，幾乎係鋼鐵組合。

不過，近年O記已經比較多同HP同Dell拍，兩年前阿J上HP，見到佢哋接收番嚟啲大陽機，已經知道不妙。HP响伺服系統嘅增長，唔少從太陽搶番嚟。近年太陽响企業管治嘅問題浮現，更令人擔心。

近年以來，IT市場增長放緩，汰弱留強，研究機構Ovum估計，過去幾年O記、I記、咪記，再加上HP四大頭，花响收購嘅金額，超過一千億美金！亦即係話，同樣金額嘅IT公司市值，從市場上消失。

收購合併頻繁，顯示市場增長放緩，只有通過收購維持增長，向股東交功課。企業合併後，通常裁員維持競爭力，然後出現新嘅行業，洗牌再玩過，係資本主義生態系統，無話啱定唔啱。

但係O記買太陽，可以話變成另一家I記（近年太陽大力拓展IT服務）HP 買埋Mercury，就路人皆見，Mark哥早想同I記鍊過。所以O記日後嘅敵人，應該係I記同埋HP。

從好嘅方面，過去幾年，O記買咗唔少好嘅應用，從CRM到ERP應有盡有，而家有埋硬件同服務，仲唔大小通吃？

合併之後，O記當然要推番自已硬件平台加服務。HP嘅Integrity，當然要企埋一邊，惟有阿超著褲，焗住推SQL，咁咪記又多一位好朋友。家剩番咪記集中做軟件，好笑嘅係以前O記同太陽嘅阿頭，都得閒窒咪記嘅標基哥為樂，合併最大得益，反而係咪記。

I記有AIX同DB2，服務外判依然係一哥。咪記就顧住砌谷歌，同埋好遙遠嘅雲端運算，大興土木起數據中心，揼唔少本錢，今趟真係「富貴如浮雲」咯。

上星期，iProA嘅十周年酒會，除咗幾百名科技界才俊，會長鄧淑明亦邀請唔少政界重磅人物，包括梁振英、譚惠珠、葉劉淑儀、羅范椒芬，仲有中聯辦，官員亦唔少，最近經常「巡廠」嘅衞生署署長林秉恩醫生，主禮嘉賓係劉吳惠蘭，星光熠熠。

以科技為開始嘅組織，有咁多政界人士捧場，證明科技夠晒深入民心。創會嘅Ringo lam同埋葛珮帆EQ亦在場。EQ話，十年前估唔到iProA會發展成今日咁樣。咁又係，初初仲以為去錯國慶酒會添！