逆市思考法

又到Q尾，人人忙埋數。今時今日，唔到數已成事實。Q1靜悄悄的走，正如好多行家，靜悄悄咁執包袱。

响Verint做嘅Priscilla小姐來電，介紹睇一本勵志書，係Paul Arden寫嘅「Whatever You Think, Think The Opposite」，佢話可譯做「逆市思考法」，讀完會舒服啲；裡面話俾人炒咗，就可喜可賀，至少有機會重新安排生活。作者文筆生鬼，篇幅唔長，呢位做廣告創作人嘅鬼才，亦作過另一部暢銷書─「It's Not How Good You Are, It's How Good You Want To Be」。

靜還靜，仍有唔少IT騷，四月尾思科仍會搞Expo。聽講今年會連續幾個星期，主要焦點會係「視像」，亦即係延續今年二月提出嘅「Medianet」技術方案，打造IP 網絡為新世代視像多元媒體 (rich media) 服務平台。

舊年思科亦有唔少視像產品出籠，好似媒體處理平台MSE3000同埋ASR 9000系列路由器，今年唔少拍乸會展示方案。最近，有線電視宣佈會用思科嘅數碼機頂盒，可以話係今年嘅大刁，Expo可能會預告未來有線電視嘅新一代服務。

思科嘅對頭Juniper就會在六月份搞Solutions Day，今年重點都可能係交換機。

不過，交換機市場唔易做，聽講H3C就已經進佔本港教育政府市場幾乎一半，可以話唔聲唔聲，嚇你一驚。

經濟唔好，活動少咗好多，PC廠商新產品就愈推愈高檔。

萬眾期待，戴爾終於推出號稱全球最纖薄筆記簿，叫做「Adamo」，呢個字源自拉丁文，意思係「愛上」。呢部機工藝技術，幾乎可以話近期扛鼎之作，尤其無邊顯示屏同埋有背光嘅鍵盤。網站設計一流，睇相已流哂口水。但係好似Mac機一樣，電池無得換，壞咗要送返原廠。網址：

http://adamobydell.com/

Adamo嘅建議售價係港幣21,999元，有情唔可以飲水飽。愛，係要付出代價嘅。

不過，另外一款肯定熱爆嘅產品，係Lenovo IdeaCentre A600，以「部屋電腦」嘅一體化設計登場，21.5吋無框高清顯示屏；除咗電源，完全毋須接駁線。最頂癮係四合一遙控器；除咗可以當電視遙控，做埋老鼠，仲可以用嚟打Skype網絡電話兼做埋手機，又可以好似Wii機嘅手制，打網球乒乓波甚至保齡球。Youtube上有唔少介紹，官方亦有一套：

http://www.youtube.com/watch?v=QCyOWQnjhQc

A600嘅建議訂價係港幣6,998元，算好合理。