咸網風雲

上星期爆出高官返工顧住睇咸網，各大保安商不約而同，接到各政府部門電話，話官府嚴正處理，攞齊咸網網址做測試，以免高官返工無嘢做，仲搞到網上大塞車。

McAfee嘅珊姐，馬上徵集各方好友，一齊測試佢哋嘅Webwasher，阻擋咸網方面，有冇漏網之魚，以免失禮。雖然大家呢方面知識廣泛，經驗豐富，力攻之下，果然撥水不進，可惜香港環保署唔係用緊佢哋產品。不過，如果高官無得撈（雖然機會幾乎係零），可以幫吓珊姐手，講唔定可以拆McAfee招牌。

講起網站過濾，其實分開消費者與商業類；商業類網站過濾最老資格，不可不提Websense（亦係最大，07年買埋第二位嘅Surfcontrol），不過環保署亦似乎唔係佢客仔，技術總監William Tam，近來好似幾唔得閒。

不過，其實有啲UTM內，亦都有本身網站過濾功能。阿J見過，以FortiGate嘅最頂癮，分類鉅細無遺，例如抄襲（Plagiarism）網站過可以過濾，唔怪得咁多大學用咗FortiNet產品。

不過通常網站過濾，都係整個網址截住唔俾睇，FortiGate就可專門只過濾有味圖片，文字依然可讀。如果看倌有興趣睇咸網之餘，只讀內容唔睇相，可以考慮FortiGate。不過據知環保署亦唔係用呢隻牌子，所以估計「高官」應該連汁都撈埋。Patrick可以向政府推介吓，無所事事之餘，亦至少可以學好啲英文（或者中文）。

此外，加速技術廠商Bluecoat，買咗Cerberian後亦有類似技術。保安廠商廠商Symantec亦佔小部分市場。不過都唔識，都係唔評論嘞。