病毒玩殘M記

上星期賣防毒起家嘅M記，聽講一半人感染病毒，以為老貓燒鬚，原來唔係電腦中招。唔少人上呼吸道感染，加埋H1N1豬流感，爆發起係都幾跨張。不過電腦公司最唔怕感冒潮，因為有遙距登入，只要大家病唔死，一樣可以响屋企，對住部筆記簿做餐懵。

近期筆記簿電腦同啲女性用品一樣，都興「超薄」，更  可以去到邊做到邊。除咗Dell嘅Adamo，新力亦响柏林IFA大會，推出VAIO X系列，11.1吋屏幕只重一磅半。無獨有偶，Thinkpad亦係用X代表「輕薄」。不過，筆記簿除咗要薄，最緊要仲係「型」，以台灣術語，即係「個性化」，否則薄過張紙，都係無用。

但係近期見豬扒嘅梁公子，買咗部Mac機，裝個VMWare Fusion，然後裝埋自己Thinkpad X嘅Windows响上面，唔駛用Bootcamp就可以跑Windows，用起嚟成部Thinkpad一樣。佢話用MacBook比較追上潮流，但又唔太習慣用OS X，想出咁天才嘅解決方法，睇起嚟係部Mac，其實係部PC，非常之零零漆。其實以祖國嘅A貨咁發達，點解唔整部Mac機殼，放部PC入去，咁咪兩全其美，又唔駛咁乜麻煩。

上星期去FCC，見到久違嘅Kitty Wan，以前响迪吉多（後來俾康柏收購，康柏又俾HP買咗），後來去咗專門幫電訊商管理收數嘅Portal（後來俾O記收購咗），再上咗上海幾年做GE嘅醫療同塑膠原料嘅孖屐亭。由IT到PVC，真係所經非一。