Win刀鋪毛

聽講話HP又會玩估領袖遊戲。Eric Goh短期內可能退休返新加坡，吳先生一直無舉家搬嚟香港，飛來飛去，都幾煩吓。兩年前香港總經理Felix See調往台灣，接替離職去英業達嘅楊人捷，應該唔會短期內返嚟。下一任可能係HP嘅香港總部內調升，目前任何事都以銷售行先，所以下任老總，可能亦係銷售出身。

最近Fortinet愈做愈好，除咗原來嘅SiS，最近新加坡嘅MTech都做埋分銷，Fortinet又請咗以前咗IT Partners嘅Erica Liu加盟，做大客戶經理。Fortinet比較集中SMB市場，高端客戶市場，真係尚待努力。以前Fortinet亦有位靚女區域經理叫Flora，不過唔知係咪釣咗金龜婿，已經好耐無見過。

講起靚女，咪記抄咗澳洲昆士蘭旅遊局條橋，打鑼打鼓請「Windows 7 Promo 達人」，日薪七千幾，據講有七百網友申請（咁啱？）。申請者當然不乏美女，包括「美女廚神」中嘅Hidy Yu小姐，仲有條嗡撈上Facebook，聽落幾多懶音，「Win刀鋪毛」果然幾犀利，不過大家顧住望佢嘅芳容，可能已唔駛理佢嗡乜。睇嚟呢位絕世好工，Hidy坐定粒六。不過第一位參麗佳麗，話佢嘅理想情人，係咪記老總Steve斑馬（其實係Ballmer），老細名都改埋，仲絕。