美國經濟再響警號？

前Aruba香港及台灣老頂Barry Lo，重返O記一段時間，靜極思動，轉咗去Intralinks。呢家公司專門協助收購合併（M&A），以雲端技術做Due Diligence，已經有成廿年歷史，拍乸係投資銀行，2006年起幾乎一半大刁都用Intralinks，香港有廿多人，辦公室設於中環會德豐。

投行做刁，準買家一定先查閱文件，Intralinks於賣方設定虛擬數據房（Virtual Data Rooms)，分享文檔加快查閱過程，更掌握收購目標業務，會計師同埋律師唔再要來回頻撲，加快完成dd checklist，Intralinks又編制咗預測全球未來收購合併活動領先指數Deal Flow Predictor (DFP)，預測未來半年做刁嘅規模，一向非常準確。

今年首季，美國經濟前景唔明朗，全球收購合併前期活動DFP以年率計跌0.8%，係2009年Q3金融風暴以來首次回落，北美DFP下跌9.3%，亞太區反而有9.7%增長，澳洲則受能源及商品下跌拖累，DFP大幅跌咗22.1%，唔怪得急忙減息。近期，投行裁員不斷，除咗中國經濟放緩，亦係因為全球M&A活動迅速減少。

數字顯示，美國經濟前景不明朗，又有加息陰影，加上美國總統候選人普遍傾向保護主義，特朗普篤定成共和黨候選人，有機會問鼎白宮。DFP報告指Trump Effect令收購活動保持觀望；四成六受訪者認為，特朗普當選有負面影響。一旦大選佔先，甚至引發資金外逃鄉；政治一日都嫌長也。

拉丁美洲M&A活動亦收縮8.1%，扭轉過去一年升勢；商品及油價下跌，巴西政局不穩亦有關，總之美洲無運行。中國M&A亦受到政治影響，安邦保險受制於國內監管阻撓，無法完成收購酒店管理集團Starwood，令人聯想中國為防止流失外匯，M&A短期放緩，不過中國外匯回穩，人民幣又升，相信好快中國企業又會四出收購。

下星期五（五月廿號）職業訓練局屬下IVE嘅IT系學生舉行畢業展覽，今次假柴灣校園舉行，通常展覽選出畢業破席，並由學生親自介紹。IVE畢業生一直好搶手，又有實戰經驗，上次去青衣校園，設施同大學真係無乜分別。