數博會升格變全球IT高峰會

舊年，中國貴陽舉行首屆大數據博覽會，貴州有意發展大數據產業，今年數博會訂於今月25-29日舉行，決定出席包括馬化騰及郭台銘、三大電訊巨頭、聯想楊元慶、飛卜Mark Zuckerberg、高通全球總裁Derek Aberle及惠普中國董事長毛渝南，傳Michael Dell都畀面出席。

舊年副總理馬凱曾，到訪貴陽出席會議，主辦單位係貴陽市人民政府、遵義市人民政府、貴安新區管委會、貴州省經濟、信息化委、北京市貿促會、中國互聯網協會等單位。但今年數博會，改由國家發改委同埋貴州省政府主辦，從省級單位變咗國家級單位。

選擇貴陽市，係配合中國開發大西北，貴州一向係「地無三呎平」，條件落後，亦難以發展工業，一直想開發旅遊，成果一般，於是想到發展大數據中心；據講連總理李克強亦出席打氣，一眾IT巨頭齊齊捧場。

今年贊助單位更多，當然包括Brocade，舊年CTO鄭剛健Ken Cheng專程往貴陽，投資起數據中心，今年亦有贊助。據講貴陽天氣涼爽，加上水力發電，係西電東送起源，電費較低，無地震風災，好適合建數據中心，並發展大數據研究。貴州一向人無三分銀，中央政府則有意開發成為數據中心基地，最缺乏當然係人材，唔知香港有無公司想參與？

本星期五（五月廿日）VTC屬下香港專業教育學院（IVE）資訊科技學科學，又再舉行畢業生年展，今次選址柴灣分校，全部都係畢業生最後一年功課作品。IVE最近贏得Imagine Cup 2016香港總決賽「遊戲」組別亞軍。而今次參展有唔少流動作品，包括體重管理程式、醫療監測程式、家居自動程式；其中用咗唔少應感器及IoT技術，證明香港職業教育真係搞得唔錯。

本港6月17日即將舉辦首席AWS企業峰會，今次應該係AWS首次香港搞咁大型活動，今月20日台北亦舉辦台北高峰會，可見亞太區生意唔錯。上月AWS公佈業績，今年首季銷售增長按年上升六成四。上季營業額已經達二十六億美金，全年應該升破一百億美金。