零售轉型

上星期百佳IT系統出錯，結果搞到拉閘開唔到舖，可謂失威。長江和記經營零售業一向好犀利，連歐洲都有錢賺，當然不是省油的燈。前年長江和記出售四分一股份畀淡馬錫，作價達四百四十億港元，即係話長江和記零售部門，總市值超過一千七百七十億港元，呢筆係淡馬錫最大投資。

零售業IT投資成本極大，毛利又低，但現金流強勁，整體財務好有利。但屈臣氏集團中以百佳利潤偏低（同系個人護理及美容最好）， 屈臣氏一向同牛仔記嘅惠康萬寧直接競爭。零售業方案以I記及NCR市佔較大，聽聞百佳就係用緊I記，CRM及分析就用O記，今次更新減價貨時出事，相信可能係人為錯誤，同系統無乜關係。

零售業競爭大，上年牛仔記終於亦升級到SAP HANA，改善 BW同報表，投資唔細，最近牛仔繼續升級系統，屈臣氏肯定亦步亦趨，搵O記幫手，其他小型零售商唔易跟隨。零售業扭盡六壬，加上數碼轉型，新一代網購流行，IT系統投入愈來愈大，不可能好似電子廠咁運作，只靠一味低孖展散貨，市道疲弱，歸邊者只會更多。

零售難做，傳媒亦打崩頭。ViuTV加入後，大台收視進一步下跌。大台新一輪部署，係推出myTV SUPER，反攻OTT平台。不過，那邊廂OTT股價愈跌愈有嘅Netflix，宣佈韓國鬼才導演奉俊昊執導及Brad Pitt監製原創電影《Okja》正式開拍，今月上架包括講女皇登基六十年嘅《王冠》（The Crown）、Netflix首部原創紀錄短片《Extremis》、法國版《紙牌屋》嘅《馬賽城》（Marseille），全部大製作，大台製作相比，只係小兒科。