網絡設備同病相憐

香港IT行業，除咪記中人以外，恐怕絕已成What’s App用戶。上星期，聽I記孖屐亭Joyce小姐話，大家用到不亦樂乎。有次開會文件漏咗屋企，即刻打電話叫老公iPhone影咗文件，What’s App傳俾佢。HH時酒吧等人，拍低杯啤酒飲剩幾多，傳俾遲到人士催促吓…
唔知係唔係生意太過好，上星期What’s App窒下窒下，收發唔到訊息。以呢個應用流行程度，真係要升級後台設備。
講起容錯及高可用方案，唔可以唔提VMWare。上星期VM終於出新版vSphere 5.0，去皇九Cliftons搞拍乸大會，乾收銀Edwin Ng賣藥，成兩三百人出席。Cliftons場地唔平，又落緊雨，反應依然熱烈，咪記中人聽到好無癮。最近唔少 Linux軟體，已經係ESXi兼容，而唔再係硬件兼容，VMWare真係無法擋。
上星期三豬扒公佈業績，投資者拋售，一日之間急挫兩成，蒸發三十幾億美元市值。其他同行股份受連累，Alcatel-Lucent响巴黎就急跌成半，Ciena較早前亦跌咗唔少。電訊網絡業務整固期，似乎係環球現象。日本地震，豬扒更雪上加霜。
今次豬扒業務表現差，思科亦無得益，周三股價從十六個幾跌落十五蚊水平。七月底，思科第四季亦正式完結，小道消息話瓜多過菜，股價跌定迎接兩星期後業績公佈。
上星期連續接到Certes Networks兩個通告，分被委任泰國nForce Security及馬來西亞Secure Source做代理商。以前Vidyo嘅Alfred Chase Hui過檔後，亦積極响香港物色代理。Certes Networks專攻VPN多層加密，通訊加密後話可以完全唔影響速度。