Palo Alto終於有老頂

上星期美股再急瀉。美國經濟出現雙底衰退可能性增加，債市孳息趨升，市場缺水，氣氛更加低迷。

據玩具廠家話，美國Mattel一再延遲聖誕交貨期，令人關注存貨量同美國經濟。講起玩具，美國四大玩具零售商，頭三位依次序係WartMart、Target早越過玩具反斗城成老二，反斗城仍處虧損，今年市況唔好，重新上市機會更加唔大，點知第四位玩具零售商竟然係Amazon，亞馬遜完全無舖頭，竟然可排老四，可見網上零售影響力。

亞馬遜網上商店包括愈來愈多不同商品，Kindle電子書熱賣，亞馬遜一直唔願意公佈Kindle究竟賣多幾多，只肯講電子版書銷售舊年已超越硬皮書。今年有證券商估計，Kindle今年銷量超過一千七百萬部，營業額二十一億美金，仲未計電子書收益。Kindle可打書釘，加上硬件續航力驚人，成書蟲最愛嘅eBook平台。

五月份，亞馬遜又推出MyHabit，私人品牌銷售網站，低售出售名牌時裝，最近又推出家居用品，價錢比街價平六成，亞馬遜改寫美國零售業，愈來愈多零售商轉投網上，肯定成為趨勢。

講番IT，舊年「單」記用十二億八千萬美金購入咗VeriSign嘅保安及認證技術部門，向本港唔少客戶介紹。VeriSign係網上最大SSL身份認證廠家，亦有Token等生意，本港有唔少金融機構，相信會係重點發展市場。VeriSign舊老頂Mark McLaughlin，終於轉投新一代防火牆公司Palo Alto，CEO位置懸空超過一年，終於有真命天子。Palo Alto最近贏到大刁，成功撬走Checkpoint客仔。呢位McLaughlin先生舊年嘅總薪酬超過四百五十萬美金，大雞唔食細米；從VeriSign轉投私人嘅Palo Alto，可見上市之期不遠，憑認股權大賺一筆。但納斯達克市場波動，會唔會人算不如天算？