矽谷大亂

今個星期恐怖事件，除咗股票大跌，仲有HP壯士斷臂，停產WebOS產品。HPiPAQ慘淡收場，估唔歷史重演。除咗放棄電話同平板電話，又考慮出售PSG。

上星期尾市HP股價再下跌兩成，全星期埋單下跌三成，唔見一百三十九億市值，市盈率五倍幾。舊年HP營業額超過一千二百六十億美金，O記加埋太陽只有三百五十六億左右，三分一左右，HP市值竟然比O記低一半有多！O記市值一千二百幾億，HP只剩不足五百億。賣鐵幾艱難，可想而知。

PSG毛利低，但出售減值商譽，拆散更難有好價，買家又廖廖可數。I記當年有Henry周，同中國高層傾掂，聯想又想「走出去」，水到渠成。市場寄望HP一去，戴爾逆市升，聯想亦受惠。

儲存股亦好傷，NetApp公佈首季業績唔好，上星期跌咗成半，尾市些少反彈。NetApp產品性能全面，競爭力強，業績都話叫唔到飛，其他更加唔駛恨。今年HP力推儲存，見NetApp業績咁，心都寒埋。

納指插水，股價水瓜打狗，流動性降低，除非有QE3，否則前景慘淡，排隊上市IPO嘅股份，雪上加霜。風險基金入嚴冬期，矽谷隨時裁員。

網絡科技股之中，Bluecoat業績唔好，股價好傷，再炒CEO謝罪。較早前炒到天咁高嘅河床，跌到二十蚊美金，從高位唔見一半。豬扒股東更集體訴訟，控告管理層誤導，實行輸打贏要，律師先係逆市奇葩。

剛接到黑莓公關通知，話已訂咗月底ICC百幾樓嘅世界最高酒店Ritz Carlton，為新Bold 9900造勢，大電訊商奉命撐場。9900除輕薄同有極流暢觸控，亦升級至全新OS 7，OS 7唔支援前機種，皆因9900支援HD高清，硬件規格大躍進。但BB播高清電影嚟做乜？

黑莓靠9900翻身，最大懸念係iPhone 5，Bloomberg已話鐵定九月面世。iPhone一出，誰與爭鋒？