請問邊度買到平TouchPad？

上星期最多人談論，除咗教主嘅健康問題，就係HP清貨只售780大元嘅TouchPad。當日數吓，總共有十幾個電郵問，有乜路數買到超平TouchPad。HP亦預留一啲供應俾媒體，但係訂貨郵箱一早爆滿，睇嚟呢鋪向隅者眾。

早前講過，今年係O記嚟香港二十五周年紀念，剛剛接到Macroview嘅Joseph來電，不經不覺又二十周年紀念，十一月十日去W Hotel搞酒會慶祝，以本土科技公司實力，Macroview可以話無可置疑，第一家取得思科大師資格，好早就推出Managed Services，又開發本身產品線。Macroview生意做得好好，早就夠資格上市。

另一單喜事，早前講過單記老頂Michael Chue榮升，原來香港區生意好到爆數，獲總公司嘉許外，仲可以去地中海旅行遊埠，Michael係長跑高手，唔少人都知，原來跑數一樣好掂。恭喜哂！

單記收購Veritas一役可以話係經典之作，唔單止儲存係IT增長亮點，Backup Exec夾虛擬環境非常好，保安與儲存仲可互補長短，近期部分Veritas技術包裝成保安出售，聽講成應唔錯，單記股價亦相對其他穩定，從廿蚊略為調整至十六蚊美金，又見到市場有收集，IT食軟唔食硬，又一明證。

部分科技股盈利下跌，立竿見影係馬上咳筆席，加埋凍結人手兼重組，美國公司手起刀落，絕不手軟，連電訊都不能幸免。最近電訊商經常執位，V記亦暫時停止聘請。

歐美電訊商緊縮，亞太區電訊商就繼續擴充，星仔繼續請人，九月十四號日本電訊NTT仲會為首個响將軍澳嘅金融數據中心（FDC）奠基，呢個數據中心投資咗三十億港紙，面積七萬平方米，共有六千隻櫃，容量好驚人。今次奠基經濟局常秘Elizabeth Tse、OGCIO新老頂麥鴻崧、日本總領事隈丸優次都俾面出席。Elizabeth Tse推動香港嘅數據中心生意好落力，今次交足功課。