交易所遇襲 產品大混戰

聯交所「披露易」網站受ddos攻擊；先知原來大公司網站保安亦好求其。

查實好多公開網站，好似網上銀行同埋Visa等大公司，甚至賭場或色情網站，經常受駭客ddos圍攻。防火牆技術一直針對ddos發展，有啲仲有所謂Reputation Based Security（RBS），網上實時探測，攻擊未到達網站前，先通知防火牆堵截IP或某種訪問？即使防火牆擋唔住，後面亦有Application Delivery Controller或者Load Balancer化解。聯交所有齊保護，一樣唔掂，究竟係魔高一丈，抑或入錯咗貨？

初期以為呢個防火牆係豬扒，後來先知係另一家老牌產品。一般防火牆有預防ddos性能，點解今次不濟？市場上亦有專門應付 ddos專門嘅防火牆，暫時「賣咖啡」較出名，之前收購咗Secure Computing，係國防企業級產品。聽講賣咖啡派人上去賣藥。單記無防火牆產品，亦有人上去獻計。單記最新產品亦係利用RBS原理防毒，呢類技術大概已經係標準。唔知另一家Load Balancer嘅大廠F5，Linda同Marco亦會唔會乘機上去，趁機遊說叫交易所換機。

以前話律師、醫生同記者心理不平衡，唔想世界太平，食蕉專家可能一樣。駭客偷襲成功，各保安專家爭相獻策。可唔可以真係安枕無憂，原來真係試過先知。

早幾年一度撤出香港嘅CA，五月份委任以前咪記嘅Francis Sun做大中華區老頂之後，一直招兵買馬，請咗部分I記舊人，近期又推出唔少雲運算產品，但CA經過之前一輸動盪，請人確有困難。舊年一度有傳聞話O記收購，最期股票回落些少，市值仍超過一百億美金，可能性唔係咁高。