HP用Beacons微定位為球迷訂小食

HP分拆兩家公司後，企業業務Hewlett Packard Enterprise由Cally Chan負責領導，新春後會見傳媒。Cally話，HP仍係X86服務器市場領導者，3Par銷情亦理想。HP分拆係希望加快創新。2002年HP率先推出Blade服務器，至今仍領導Blade市場。另外，HP亦推出融合架構、流動方案以及大數據。

今年流動方案加入咗Aruba，除咗Wi-Fi之外，管理方案ClearPass成為唔少企業採用為NAC，加入Innovix及edvance作為分銷商。Cally話，美國三藩市Levi's Stadium利用咗Aruba低耗能藍芽Beacons技術；球迷電話只要裝好App，就可用電話睇即時畫面重播，亦可用安坐席位訂小食，馬上有專人送到，唔駛走來走去；呢個技術稍後可能介紹到香港。Levi's 球場係美式足球隊49ers（淘金者）主場，可容達六萬八千五百人。Beacons技術採用蘋果iBeacon微定位技術，同時可支援六萬幾用戶。Beacons亦可作為室內定位；例如顯示商舖精細位置，甚至為盲人導航，應用廣泛，又比Wi-Fi定位成本低好多，亦有唔少商舖開發各種推廣App。

Cally話HP秉承創新，亦有參加ASTRI創新活動。2013年，HP與ASTRI在科學園成立大數據研究中心，以Hadoop為基礎，共同開發HAVEn大數據平台。機構想利用Hadoop大數據技術，必須有技術人員開發MapReduce，HAVEn可簡化開發過程，一般機構亦可以容易掌握Hadoop分析。

HP香港原來管理香港及澳門市場之外，亦負責埋外蒙古。原來香港管理外蒙業務已經兩年。Cally話，除咗講蒙古語，外蒙人亦講韓語。唔知睇唔睇埋韓劇。外蒙業務交香港負責，據講客戶相當滿意。Cally認為，中國推一帶一路，HP服務更多中亞國家，係大勢所趨，將來可能進軍更多中亞地區。

負責儲存嘅Kenny就話，3Par增長唔錯，未來會主攻全快閃（All Flash）儲存。硬盤面臨淘汰，3Par一開始就針對快閃儲存特性開發，全快閃對3Par有利。3Par在Thin Provisioning技術亦有優勢，儲存可用面積，比對手多五成。因為部分廠商儲存系統，有啲似發水樓，實用面積同建築面積相差好遠！