Elastic Stack下載一億次

又到年初，唔少企業進入筆直階段，首季業績一般過一般，尤其硬件之類更難捱。Nutanix第二季度業績公佈之後，股價跌咗兩成幾。但真正業績，可能要到第二季結束先浮現，美股亦應該進入調整期。

上星期Elastic公佈，Elastic Stack下載量突破一億。雖然話，Elastic Stack屬於開源軟件，但始終唔係遊戲，產品概念唔易理解，加上要一定技術能力安裝，竟然都下載一億次，頗不簡單。最近，中信電訊CPC引入英國保安產品DarkTrace，聽講亦係利用Elastic開發。Elastic建立索引速度奇高，唔少用嚟做網絡保安。Elastic嘅下載率，可能對行業有啟示作用。

Elastic屬分析大數據工具，係當今熱門技術，再加上免費開源，唔少人下載自行研究。利用大數據、機器學習、預測分析；最大應用範疇係資訊保安同市務，亦有用於偵察欺詐。

檢尋引擎發掘營運智能，最出名要數Splunk，優點係有相當多應用Template，比較容易套用，直接分析日誌或非結構性數據；用Splunk優化業務運作。不過單用檢尋引擎並唔夠，仲要有數學統計模式推測，例如用R之類。

數學應用於商業範疇，可以話無窮無盡。最近有保安應用以Bayes’Theorem，研究網絡受攻擊後，究竟連帶出現乜嘢其他情況，原因係受病毒入侵嘅主機，可能無乜蛛絲馬跡，神不知鬼不覺，必須從周邊統計數據，推斷有幾大機會中招。

呢種根據B，推斷A機會率嘅關係方式。比較簡單嘅解釋，以莫雷拉跑出頭馬機會為例，再研究馬匹往績狀態，應該實食無黐牙，其實不然。假設雷神每次天氣轉凍，贏馬機會大減，如果今日溫度又偏低，計算出贏馬機會可能大減，單單研究雷神同埋馬匹勝出機會率，都不足以推斷賽果。

聽講，前電盈Irene Lai已過檔Splunk，出任亞太區公關，希望日後可同傳媒分享多啲貼士。