環頭環尾的共創空間

上周，科技網站CRN爆出思科有意全球裁員達一萬四千人，佔全公司總數約二成。思科剛公佈業務唔錯，2016年第四季度收入有一百二十六億美金，雖然服務營運商同埋新興市場都放緩，收入仍然上升，目標價更有望從三十美金，升到去約四十美金，Chuck Robbins可謂交足功課。今次裁員原因，據講係思科有意轉型為一家以軟件為主導，重組人手。不過思科幾乎年年都重組，大家習以為常。

下星期思科會到賭城開GSX（Global Sales Experience）大會，全球應該差不多二萬多名員工參加，舊年蘋果老總Tim Cook曾現身GSX，大講「思科／蘋果」夥伴關係，而Cook更表明雙方關係唔係一朝一夕，而係天長地久。蘋果夥拍思科，係因為要進軍企業市場，其中一個重要支撐點係網絡功能，隨住iPhones、iPads、iOS apps等，可深度結合思科技術。事實上，因為Android設備市場分散，發展企業流動apps選擇iOS愈來愈多。

今年GSX會主打SaaS，即係話會係以軟件為先，但思科可以話係全球最大Box Mover，成為一家軟件公司唔係咁易，講番Apple，每家舖都有Business Team，力爭發展商業客戶，如果參加商務計畫仲有技術支援，搵Genius Bar幫手唔駛卜。

剛去西營盤皇后大道西林品珍茶莊買茶葉，見到對面街有間獨立Co-working space，叫「The Desk」，專門畀創科公司租用，入內見到創辦人Adrian Yap，The Desk有成三層，個場開咗三個月，已經有三十幾位租客進駐，租用方法亦好靈活，可用人頭計，據Adrian講亦有外國公司進駐。香港商務中心非常昂貴，新創公司通常負擔唔起，數碼港同科學園又可能唔就腳，中上環就愈來愈多類似Co-working space。The Desk內部設計成唔同主題角落，方便唔同思考創作工作，有啲類似法國Numa，雖然唔似得Numa咁大，但好有格調，希望多啲人可以在The Desk創業成功。