香港成《Pokémon GO》之都

《Pokémon GO》已經肯定係迄今最成功手遊，。幾乎影響工作治安，醫療及教育人員都要求遊戲商唔好在醫院及學校放精靈。唔少精靈都在公園出現，晚上人頭湧湧，大家對住手機散步，唔少一家大細去捉寵，好多地標，即使住在旁邊都未必知。從好方面去想，唔駛等到星期日全民運動日，唔少人運動量已顯著提高。

《Pokémon GO》結合智能手機AR及GPS，兼且容易上手，幾乎老幼咸宜，加上社交媒體推波助瀾，香港無線網絡發達，智能手機普及率高，加埋社交媒體，人口稠密交通運輸發達，訓練員可四圍去，隨時補充，加上Ingress遊戲發展留下大量地標做補給地點Pokéstop，可話係《Pokémon GO》完美風暴。

本港唔少商場已經宣佈使用Lure Module時段，吸引小精靈現身。有商場專頁甚至追蹤精靈位置。

除咗主要商場趁勢宣傳，剛獲蘋果注資十億美記嘅滴滴出行屬下「快的Taxi」，已經係Uber本地最大競爭對手。「快的Taxi」香港城市經理吳澍基，從不放過宣傳機會，馬上推出優惠，乘客上車後開啟《Pokémon GO》捉小精靈，再於「快的Taxi」專頁「回應」附加捕獲小精靈截圖；就贈送禮品卡。

網絡設備生產商Extreme Networks就宣佈在網絡分析工具ExtremeAnalytics內加入《Pokémon GO》「應用指紋」分析《Pokémon GO》對網絡影響，甚至禁止網絡內玩《Pokémon GO》，變成《Pokémon NO》。

但係《Pokémon GO》熱潮可持續幾耐？從技術上講，《Pokémon GO》有好強本地化能力同地圖資訊，發展出不同商業合作模式，加上唔少寵物，已紅透半邊天，分分鐘可發展跨地區賽事甚至旅遊項目；從捉寵認識景點；旅遊發展局應該留意下。

上星期另一有趣新聞，係中國網信辦鼓勵互聯網內企到香港投資，不過竟然同新聞自由有關。《國家信必化發展戰略綱要》提到，鼓勵內地互聯網企業到香港發展及尋求合作，當局統籌畫建設中國全球網絡設施，支持企業拓展海外業務及節點布局，即係擴大內地互聯網企業海外影響力。

國際普遍認為，全球最先進社交媒體，除咗飛卜就要數騰訊。全球通行嘅飛卜，市值仍比騰訊高一千億美金。但係長遠功能開發，騰訊更勝一籌。本港銀行業，積極尋求同騰訊合作，已係公開秘密，只要通過金管局監管一關，騰訊支付可改變本地金融行業。騰訊股價，可能升完再升。