Wi-Fi唔易做

上星期，唔少人都顧住睇奥運。巴西奥運有唔少負面新聞，但其實技術上已做得唔錯，技術贊助係Atos，網絡則由思科負責。

思科亦在巴西里約熱內盧建立全城IoT無線網絡，以技術重新開發當地Porto Maravilha港口，呢個港口已經被棄置長年，巴西政府想利用世界盃同奥運等盛事，振興呢個地區。思科利用IoT無線網絡，為呢個重建計畫，注入智能城市概念。無線網絡除咗作為奥運，亦為未來城市發展鋪路。

但係，無線Wi-Fi網絡非常難做，競爭劇烈；HP收購Aruba後，重點已轉移在ClearPass嘅NAC功能，Ruckus就出售咗畀Brocade，焦點轉移結合5G。豬扒曾收購Trapeze Networks，但最終亦經營得唔成功；摩記則主要係做專門市場。中國北極光投資嘅Aerohive，近年力攻教育，股價唔見有大起色，思科最有聲有色，佔咗全球近一半市場。

有日開會，講起以前管理Trapeze Networks嘅Samuel Liu，原來Samuel加入咗CBC（China Broadband Communications），即係天維信通，變咗國際電訊商副總裁；CBC總部設在北京，亦有响香港及台灣插旗。天維信通總裁Richard Fung馮昕則係响中大電子工程畢業，後來去英國帝國理工深造，CBC主要投資者係中國寬帶產業基金投資，係網通主席田溯寧（Edward Tian）牽頭成立嘅高科技私募基金，呢位田先生曾經主持網通收購電盈兩成股權，成第二大股東。CBC主席韋軼群係田溯寧在網通時期部下，09年開始與田溯寧一齊創業。

Check Point稱在高通芯片嘅Android驅動程式內，發現有四大漏洞為QuadRooter。有關消息媒體大肆報導後，加上香港保安事故協調中心發出「極度危險」警告，Android一族人人自危幾日，但Google話Android 內置VerifyApps 功能，大部漏洞都已經解決咗，多謝Check Point關心。

今次係高通手機芯片有問題，MTK用戶以為自己好安全；MTK專打低下價智能手機，亦試過嚴重保安事故。高通就公布話，今年二月至四月已經知悉有關漏洞，後來一直向客戶、技術夥伴及開源社群推出有關。不過即使話有今次事故，亦好難動移高通流動市場地位。