感測鞋墊變長跑教練

有人話，中國下一波工業神話係眾籌，雖不中亦不遠矣。京東、小米、阿里、蘇寧等，紛紛推出眾籌，2015年中國眾籌集資額，已比前年增長超過十倍；其中以京東最成功。香港眾籌鬧出大笑話，大陸爛尾者，固然亦唔少。京東有家眾籌初創叫「跑動」（Podoon），已開始出貨，專門研發改善跑步姿態Podoon壓力感測鞋墊，採用ANT+技術再加上低功耗藍芽(以前稱Bluetooth Smart)。

創辦Podoon嘅福建人鄭煊，亦係長跑迷，清華大學電子工程系畢業，讀書時精研長跑，讀大學任長跑隊長，鑽研訓練心跳率，後來研究跑姿，減少肌肉關節損傷。好多人知道，跑步靠臀部力量，一旦用錯肌肉發力；膝關節就代替髖關節承受撞擊，嚴重可導致膝蓋損傷。

Podoon壓力感測鞋墊用EVA材料製造，嵌入0.2 mm厚薄膜壓力感測器，取代原有鞋墊搜集跑步數據；手機下載跑動App後，傳回記錄數據；包括跑步姿態、著地方式、步頻、地面接觸時間、觸地騰空比、膝蓋負荷指數、過度跨步(Over-striding)，足內旋等問題，感測鞋墊有「離線」模式，跑步唔一定要帶電話，之後連接App同步數據亦得。

ANT亦公認係最可靠感測器資料收集、自動傳輸同埋追蹤技術； ANT+超低耗電短程無線連線，廣泛用於消費醫療、運動器材、健康管理等可穿戴產品；Podoon則選用北歐廠商Nordic Semiconductor嘅多協定SoC系統晶片，準確率應該唔差。

香港長跑愛好者愈來愈多，唔少人全世界四圍參賽馬拉松。Podoon作為自助跑步教練，相當有啅頭。京東幫助Podoon創業，然後做埋網購分銷，壓力感測鞋墊網上價盛惠199人仔。