法國環保科技參加亞太創新峰會

飛機上，碰到思科老頂Barbara Chui，原來連台灣都負責埋。思科領導多項IT產品；包括網絡、統一通訊、無線網絡，最近保安及IoT亦做得唔錯。思科同法國有IoT合作，蘋果亦有戰略合作，iOS 10版本深度整合思科技術。Barbara Chui話，思科在大陸亦接到IoT項目，稍後有公佈。

講起IoT，法國有唔少創新企業，最出名要數建立全球IoT網絡營運商SigFox。上星期，科學園舉辦《亞太創新峰會》，法國商務投資署 (Business France) 率領7間法國環保科技公司代表團訪港，支持機構有Bpifrance及匯豐銀行。Bpifrance係法國信託儲蓄銀行 (Caisse des Dépôts) 子公司屬下投資銀行；透過貸款、擔保同股權投資，為唔少法國企業，特別係創科，提供種子以至上市融資。

Bpifrance投資唔少法國創新及加速器，手頭投資金額多達180億歐羅。Bpifrance利用NUMA等加速器，撮合創初、大企業、學生、學術界等合作，相當成功。法國係推動創新及數碼轉型最成功國家之一。法國IoT更獨步全球，除咗SigFox最近登陸台灣，另一家經營低功能廣域技術網LoRaWAN嘅Actility亦係法國公司；最近夥同富士康在香港成立公司推動ThingPark平台，又同Softbank合作，到日本推動LoRaWAN技術。Actility主要投資者亦包括Bpifrance，而富士康母公司台灣鴻海亦有份。Bpifrance亦同時投資SigFox。

法國發展數字化經濟，不能不提前經濟部長馬克朗（Emmanuel Macron）。現任總統奥朗德（François Hollande）民望低迷，連任機會唔高。八月底馬克朗掛冠，應係為明年參選法國總統舖路。馬克朗係政治素人，未參加過選舉，從政前做投資銀行家，讀書成績優異，受年輕選民支持，可能成為黑馬。但渠曾贊成Uber經營，受法國的士司機圍攻。

法國來港工作人口，過去幾年急升，包括唔少創科公司；推動法國數碼轉型嘅La French Tech亦舉辦唔少活動。法國環保科技蓬勃；2014全球環保科技創新指數（GCII）中排行15，當中以環保科技創新條件（全球排名第4）同埋再生能源國家吸引指數（全球排名第5）成績顯著。