又到聖誕

又到聖誕，係送禮旺季，電子產品宣傳炸爆郵箱。雖然話，現時已唔興饑餓行銷，但從電子產品預訂，仍可竊見下季業績，蘋果MacBook Pro推Touch Bar功能評價一般，訂貨仍要等足幾星期，AirPods亦要等，iWatch特別牌亦係等。果粉一擲千金，今年好不景氣嘅PC廠商，只有望門興嘆。

本港IFC一直係蘋果最盈利店舖之一，想預測下季業績，可觀察吓人流。其他高價電子產品，深圳DJI亦賣滿堂紅，新出Osmo手機雲台固然賣得唔錯，Mavic Pro交唔切貨，搞到電郵致歉。

華為Mate 9亦成龍友摰愛，Leica鏡可拍出黑白沙龍照，超大光圈2.0，營造景深效果，竟然似專業機，唔駛再帶大機影相。華為曾經一度想過出售終端業務，估唔到電話竟靠相機出位。

大台又發盈警，話專注發展OTT，要放棄收費電視牌。政府曾因免費電視牌，搞到焦頭爛額，似乎唔發好過發，亞視摺埋，無益大台，免費電視台為搶廣告，更加扭盡六壬，折扣愈來愈多。大台自從中國梅鐸加入後，決策似乎快咗好多，如今想變身中文Netfix。

全港最大OTT，唔駛講係Netfix，已經有唔少經典製作，其中最出名係《紙牌屋》，近期《Sense8》同埋《Black Mirror》，最近則有《深夜食堂》，近期唔少香港日本居酒屋，多咗塊男主角小林薰宣傳像，呢位小林薰演技精湛，Netfix為咗聖誕檔期，宣傳密集過電影，Sense8仲聖誕前夕推出A Christmas Special添，大台要做Netfix，要拍多幾套經典嘞。