中國員工保安意識差

思科一向是網絡設備大哥，最近佢哋進行全球性資料遺失錯誤嘅調查，話其實唔少保安漏洞，都同人嘅行為習慣有闗，所以了解員工行為，可能比升級IT設備緊要。

思科委托美國調查公司InsightExpress嘅全球性調查，部分幾有趣，顯示中國嘅員工風險意議唔高，各位老細要留意吓嘞。

調查訪問十個國家內，不同行業及規模嘅一千位僱員及一千位資訊科技專家；包括美國、英國、法國、德國、意大利、日本、中國、印度、澳洲及巴西，因為呢啲國家各自代表不同社會同埋商業文化。中國竟然有五分之一嘅員工，擅自更改電腦上安全設定，進入未經授權網站。呢個結果唔出奇，中國員工用電腦習慣一向令人頭痛，尤其係唔少人用驣訊嘅QQ即時通訊，經常在線傾偈同下載，好多保安閘道同埋防火牆，都無乜QQ乎，印象中只有FortiNet嘅產品（可能國內研制關係），可以攔截QQ。

此外，中國有接近三分之二的受訪者嘅資訊科技專家，遇到員工未經授權，就存取網絡同埋設施，有時中國公司內嘅電腦室，可謂無掩雞籠。接近三成嘅中國員工，將財政戶口登入名稱同埋密碼儲存在電腦。超過四成中國員工，將公司資料儲存手提儲存設備，然後仲攜帶離開辦公室，所以在中國嘅公司資料，經常都有頗大失竊風險。

但有一個數字，就超過五分一嘅德國員工，容許非僱員未經監管下，响公司內隨處遊走，十個調查國家嘅平均數，只係百分之十三。點解咁多無謂人，會响德國公司內自出自入四圍走，咁就真係唔知嘞。