MacBook出爐人山人海

剛收到英特爾第三季業務，受惠Netbook嘅Atom，以及流動處理器（即係Notebook電腦）銷情理想，收入有成一百零二億美金，不過有二億六千幾萬特殊虧損。除咗證券投資（呢樣難免，大家近期都會損手），其中兩億五千萬都係投資Numonyx有關。

Numonyx係乜東東？原來亦係記憶體廠商。大家可能唔會記得，70年代初英特爾就係做記憶體起家，結果幾乎搞到破產。後來，Andy Grove走出英特爾總部，再返入公司向大家宣佈，英特爾放棄記憶體業務，進軍處理器。1974年，英特爾開發出8080晶片，終於第一套商業化個人電腦Altair問世，之後就係有位Bill Gates既人兄，唔讀哈佛去搞電腦。

估唔到英特爾，做親記憶體都無乜好下場。

講開英特爾，自從2006年蘋果轉用X86處理器，MacBook一向都用埋哋嘅整合圖像晶片，點知上星期去到MacBook發佈會，已經全線都轉用咗NVIDIA GeForce 9400M，發言人不斷重複，話比上一代英特爾快咗五倍，直係好唔俾面。

英特爾一向都想將圖像整合同一平台出貨，除咗CPU仲食埋GPU市場，但係愈來愈多廠商，轉用第三方圖像晶片，短期內呢個算盤打唔響。

不過蘋果強調圖像速度，其實好有道理。因為唔少做拍攝嘅專業人士，都係用Mac嚟做剪接同後期工作。此外，幾乎全世界大部分嘅醫生，都係用Mac嚟睇醫學掃描影像片。因為有幾位醫生，响OSX開發咗一隻叫做Osirix開放源碼程式，能夠處理MRI、CT、PET影像，甚至用嚟睇研究癌症嘅PACS影像，呢啲影像好複雜，要求分分鐘高過打機。

講起蘋果，上星期响置地文華嘅記招，人山人海，大家一見到新MacBook個靚樣，即刻「嘩嘩」聲亂哂大籠。差啲唔記得，MacBook仲係時裝潮流，下次記招，應該搞埋Catwalk。