又到TechED

以公關嚟講，咪記財雄勢大，所以全球公關大會，除咗佢哋公關大姐Alice以外，連服侍佢哋公關公司嘅靚女Monica都有份去西雅圖見大老細SB。

不過咪記開會，都人山人海，今年十月八至十號，又响香港搞TechED，肯定又有幾千人參加，而且入場費仲要成千幾銀，其他IT公司只有望門興嘆。佢哋每年在佛州迪士尼世界，單係專門做俾內部孖屐亭人員嘅MGX，聽咪記孖屐亭B小姐話，就有一萬三千人咁多。可見咪記真正身份，其實係一家搞孖屐亭嘅公司。

上星期，O記在舊金山開2008年全球大會，招呼啲客戶，一個星期內，香港嘅公關竟然發咗十二篇新聞稿，可以話破哂紀錄。

聽講話O記大會都有四萬幾人捧場，但係咁多新聞稿，就好難消化。但O記都順便頒吓獎俾「拍乸」，其中包括頒獎俾亞太區最佳合作伙伴，其中最佳製造、經銷與零售行業合作夥伴，頒咗俾上海嘅全富漢得軟件，呢家公司在ERP，特別SAP同埋Oracle都做得唔錯，老總范建震曾經在一段ERPWorld訪問中，話漢得軟件當哂客戶係衣食父母，所以即使公司聚餐，都用客戶品牌。「舉個例子，我們去聚餐，啤酒用青啤，家里喝牛奶，是光明的，因為都是我們的客戶。」好在「三鹿」應該唔係漢得軟件客戶…。

呢位范老總口才了得，係復旦大學高材生，聽講高爾夫球仲打得唔錯。