2008年10月16日星期四

科技股榮辱互見

金融海嘯吹到香港會有幾勁,大家都唔知。聽講技術上,新加坡已經陷入衰退(連續兩季出現負增長)。美國科技股跌得好緊要,以大陽電腦為例,股價直線下跌,依家市值只有三十九億美金,而佢哋手頭現金已經差唔多可買番哂全公司股票。

好多科技股大跌,好多揸咗公司股票嘅IT人即刻身家縮水,但係I記就因為股市跌得緊要,提高公佈業績,話第三季賺成28億,而且繼續回購股份,股價表現唔曳,至少好過大市。I記响亞太區收入比例好高,尤其係中國業務進入收成期(中國IT投資比率高到出奇,第二季單係上海收入增長咗兩成,佔亞大區收入又差唔多兩成)。而I記手頭現金,更加有成98億美金,其他科技股份跌得殘,仲可以趁機收購添。

趁金融海嘯未吹到嚟,約咗富士通香港嘅Candy飲茶,中環嘅茶樓依然人山人海,佢哋下半年仲有大把破席做,年底又有針對企業嘅通訊產品,佢話富士通在電訊行業有唔少大客仔,年中又會同電訊商推出新增值服務。舊年數據中心大幅擴張,佢哋嘅伺服器生意唔錯。佢哋亦會同拍乸夾份,推SAN區域儲存同埋虛擬化嘅方案添。

潮流興講虛擬化,執輸行頭慘過敗家,最近一次TechED,咪記請咗大師級嘅 Mark Russinovich來港講Keynote,亦都喺講Windows虛擬化方案,呢位Mark哥响國內好有名,因為佢個Blog經常刊載點樣為Windows偵錯,而佢開發嘅工具Process Explorer更加係最熱門嘅下載,好多網站都有討論,而且又寫過唔少暢銷技術書,被譯成多國語文。不過呢位Mark哥身裁健碩,聽佢話每星期做六日運動,真係犀利。本來佢嚟香港後,就去歐洲講虛擬化技術,點知歐洲吹正金融海嘯,連技術會議都取銷埋,可見呢鋪歐洲真係好杰。

沒有留言:

發佈留言