2016年6月8日星期三

VR可以去到幾盡?


上星期Computex,唔少人到台灣,遇見桃園機場水浸,機場大亂時正遇上遊客離境。機場算係關鍵設施,遊客少見機場發生澇災,紛紛舉手機拍攝,結果成為Computex以外最大國際新聞。

Computex分三個展館;包括推動科技創新InnoVEX特區,有唔少新創企業。而大部分外國廠商,包括咪記則在南港展覽館。南港展覽館剛好在捷運站上,比較方便。台北天氣唔係落雨就酷熱,南港幾乎最多人流。

但今期最熱,仍係VR技術,台北世貿三館InnoVEX除咗新創企業,積極轉型嘅HTC,亦有多款VR遊戲。HTC首款虛擬實境系統HTC Vive幾乎熱爆,不少其實有Console Game水準;其中一項叫《Birdly》,體驗遨翔天際,用家俯伏裝置上,雙手拍翼動作,在虛擬實境城市中飛行。裝置前方裝咗電風扇,用家模由高空向下俯衝,風扇發出強風迎頭狂吹,營造氣流效果,但唔少玩家用完都話頭暈。電腦廠家CoolMaster,就用咗飛卜嘅Oculus Rift出品VR,玩跳傘ParaParachute,降落時亦有風吹住,更加刺激;玩家吊住Harness模仿自由降落,一路跳一路尖叫。

HTC Vive六月全港發售,賣八千幾港幣。如果Computex試過,肯定覺得物有所值,Vive其他遊戲包括Front Defense,體驗二次大戰巷戰,靠沙包保護,前方有攻擊,馬上要踎低或左閃右避。稍後應該會有人經營呢類VR機場,供玩家互相大打出手。

HTC仍然決心發展高階手機,根據測試手機鏡頭及攝影機權威DxOMark公佈性能比較,排首位係台灣HTC 10,三星手機S7排第二,兩款都係利用Snapdragon 820。

但係去到咪記,唔有Hololens,咪記宣佈開放以Hololens虛擬實境運行嘅全新平台Windows Holographic,邀請既有Windows 10硬體夥伴參與。Windows Holographic比VR仲犀利,打造「混合實境世界」(Mixed Reality);由Virtual Reality「虛擬實境」及Physical Reality「物理實境」混合而成,即係在實境加上虛擬,明未?



沒有留言:

發佈留言