盡地一煲

上星期，股神畢菲特透露，出售咗巴郡所持約三分一I記股份，又認為I記面對強大競爭壓力，必須重估I記股值。本港I記剛宣布，老總Tony Tai正式榮休，換上Francis Ngai為香港區總經理。Tony退休傳聞一段時間，推遲好幾次；Francis Ngai接任，正好迎接雲轉型挑戰。

I記業績受壓力，股神都要沽貨。上年底，I記再聘請前花旗高層Michelle Peluso任CMO。I記向雲運算轉型，為添新思維，加入消費金融高手，並重新佈陣，結果要拭目以待。

Peluso大幅調整I記市務策略，唔駛幾耐可見真章。I記雲運算及認知運算產品發展得早，何以唔能夠於行業起飛之際獲益？管理層洞悉徵結，大刀闊斧，改革市務及銷售策略，但似乎就無大量裁員跡象。

另一家正經歷調整期，就係Oracle；上年被指誇大雲業務收入，雲業務落後於對手，管理層發現銷售隊伍，唔能夠應付雲業務發展。去年初，O記曾經大張旗鼓招聘，話在亞太區請多千人，銳意擴展雲業務。一年過後，發現唔多可行，終於徹底分離雲業務，計畫大幅裁員；側聞有三分之二銷售人員，職位可能不保。

消息指，O記經歷十多年來，最大規模裁員及改組計畫，雲業務完全脫離舊架構。新O記雲部門正四出招聘，索性連地址都唔一樣。唔少雲業務成功嘅公司；包括AWS、Google Cloud、Azure現任僱員，成為挖角對象。但重新成立公司，成本亦馬上加倍，今次O記盡地一煲，唔知開大定開細？