匆匆澳門行

上星期，陪豬扒公司嘅Queenie小姐，去GSMA Mobile Asia聽佢哋公司派嚟嘅專家，講「固網流動匯流」（FMC），今年係GSMA第二年到澳門威尼斯人辦會議，順便仲見證亞洲最大嘅爛尾樓工程。

去到珠江船務，唔少阿叔阿嬸响度換飛，全班船坐無虛席，不過睇個樣唔似去參加會議。今年去氹仔有金光飛航，終於唔駛搭咁遠車。不過，海上大風大浪，一上船就話無熱飲供應，搞到Queenie竟然暈船，落船發覺氹仔空氣又差，乘客馬上吞雲吐霧，走都走唔切。

去到會場，上網註冊入場，點知程式「輕輕」地，搞咗一大輪，先至入到場。跟住去到演講場地，未坐定，Queenie話演講開波嘞。噫，咁啲聽眾响邊呢？數來數去在坐十位人兄，其中五位仲熟口熟面。講者係豬扒VP，FMC嘅首席技術官Malik，來頭唔少，內容精采，不過由於場地開放，附近環境聲太大，所以只聽到一半，筆記都寫唔切。

Malik匆匆講完，就要搭船趕到香港再飛返美國，真係頻撲，聽講話大會一場演講，盛惠要二千英鎊，計埋講者來回機票酒店，真係唔簡單。聽完演講，去商務中心拜訪吓啲客戶，先發覺酒店真係好大，可惜指示就麻麻地，結果行來行去，行錯咗去賭場，呢邊人頭湧湧，分別好大。

下午五點半，會議完咗有派對，成班自己友飲完兩杯，搭車去到碼頭六點半，原來七點半先有回航船，結果咁就無咗一日。

聽講話GSMA同威尼斯人簽咗三年約，下年真係要努力搵多啲人流。