H3C搬大屋

H3C搬去銅鑼灣時代廣場，大咗好多，樓下食通天，唔駛再成日都去《西苑》，人迫人，面撞面；咖啡品牌選擇多，有錢真係唔同。

H3C已經係3Com全資附屬公司，較早前3Com仲宣佈內銷變出品，H3C品牌推向全球，挑戰思科。聽講話過兩個月，仲推出新防火牆同埋IDP等保安產品。H3C嘅交換器好賣得，推針對數據中心推S12500系列，產品總監Penny話，搜狐同埋淘寶網都用緊。

中國網上業務發展驚人，尤其係淘寶網，連eBay都打垮，年交金額交易超過一千億人民，連紐約時報都報導，數據流量驚人可想而知。如果淘寶集資，肯定成為另一網絡股王。

以前個個恨做Vendor，不過Vendor壓力好大，好多人寧願返去做分銷。繼Patrick Lai返B&Data後，藍衣人嘅Stanley Chung去咗做MTech嘅大佬。MTech有做Bluecoat，又兼顧埋Riverbed，最近連Fortigate都做埋。兩間分銷嘅產品都好熱門。

台灣風災泥石流之後，日本海底又話地震，震散海底光纖。本港上韓國同埋日本網絡大塞車，兩家P仔條線都慢咗好多。上星期，行家各自搵分流，本港嘅電訊市場開放，可以迅速分流數據，唔少東南亞國家，好似菲律賓慢過慢打鑼。

講起大P，老友話打親電話，管理人員都話放緊假，唔好意思問P仔係咪真係有咁多假。