科研大國

唔少人都可能聽過I記嘅人工智能超級電腦Watson，上星期在美國電視常識問答遊戲「Jeopardy!」熱身賽，竟然贏咗冠軍人物Ken Jennings及Brad Rutter，據講中國研究人員今次比拼中，出力不少。

I記嘅深藍（「Deep Blue」）超級電腦，亦曾在一九九七年，擊敗俄國棋王Garry Kasparov，但係深藍除咗國際象棋，就乜都唔識。Watson能夠參加常識問題，明白主持人問乜，再正確回答問題，可謂一大突破。超級電腦成為江湖百曉生，雖然暫時無乜商業價值，但玩問答比下棋難好多，更接近人腦運作，明白人類語言表達，相信亦只有I記，先可以投放咁多資源研究上。

Watson嘅團隊包括I記响各地專才，不過中國已成研究大國，曾訪問過I記中關村中國研究院嘅人都會同意，中國研究實力強勁。中國嘅電訊設備研究亦好先進，華為及中興在電訊業擁有唔少專利，比國際毫不遜色，中興通訊（股票編號：763）剛公佈持有4G嘅 LTE必要專利達235項，仲話明年佔LTE嘅必要專利會達一成。本港CSL嘅LTE網絡，亦主要用中興設備。

正在賭城拉斯維加斯舉行CES，每年《Popular Mechanic》雜誌辦編輯之選，今年勝出嘅電子產品，係一個由Cobra公司發明嘅藍芽電話扣（PhoneTag）同手機Apps，利用藍芽技術追蹤隨身物品；如鎖鑰銀包之類，一旦大頭蝦遺留物品，手機嘅藍芽發覺隨身物品同物主分隔太遠，就馬上發出警號。

https://www.cobra.com/category/bluetooth-communications.cfm

即使遺留下物品，手機亦會記低遺失物件嘅最後位置及時間，發出訊息或電郵去指定郵箱或Facebook，呢個電話扣亦可以用嚟追蹤手機，一旦手機離開物主距離太遠，電話扣亦發出警號，以防電話被人順手牽羊。

大家可能都有遺失物件經驗，然後四周圍搵餐死，甚至不翼而飛。不過有Cobra公司出品，就唔怕遺失或者唔記得帶重要物品。不過，手機經常開著藍芽，耗電量唔細，如果用緊iPhone就更煩。

無獨有偶，翻閱今期《中大校友》雜誌，介紹香港科學園一家叫「安文科技」，兩位電子工程系畢業生有類似發明，叫掉失提示器「Bobolink」，具同樣功能，耗電量超低，似乎比Cobra發明仲要實際，可惜佢哋無緣參加CES。