OGCIO政績

上星期，前OGCIO總監葛輝（Jeremy Godfrey）爆大鑊，要與老頂商務及經濟發展局常秘謝曼怡對質，話判出協助低收入家庭學童上網嘅 Internet Learning Support Programme (ILSP)俾iProA有政治考慮，立法局隨時召開特別會議。

內定合約通常叫Bid rigging，唔少地區都係犯法。但葛輝話事件iProA嘅前主席葛珮帆並無介入，全程係政府高人指使，即刻受益人無罪，錯在政府高層有人想擦鞋，明益iProA。葛輝指政府高層施加壓力之時，特意唔用電郵，即使召開聽證，各執一詞機會好大。

講返OGCIO，有唔少合約批出，但各部門IT經常自行採購，影響力遠不及ITSD時代，大家一般只係當政府發言人看待。OGCIO總監三年一任，無風無浪，應該去到今年四月。

不過江湖傳聞，葛輝仍是貴冑公子，老電舊日同事話，Godfrey算係大姓氏，大家以往俾幾分面，响英資嘅機構（大東、老電、PA）如魚得水。OGCIO乃肥缺，主要負責執行政府响一九九八年提出數碼 21資訊科技策略，即係推動eGoverment策略是也。

不過，前年政府審計處出咗第五十二號報告，批評OGCIO嘅工作表現，唔單止好多項目延誤交貨，進度成果又紀錄不全，GovHK網站接受程度不佳，葛輝離職後接受訪問，被問及點解GovHK一站通設計依然憨居又難用，佢輕輕帶過，GovHK仲係WIP，已經奠下基礎，俾下一任努力咁話。OGCIO以往兩年有乜政績，有目共睹，遇上Liz Tse，急驚風慢郎中，即使唔派偉大政治任務俾佢，搞到一鑊泡，亦遲早一拍兩散。

商務及經濟發展局問題多籮籮；旅遊業議會加上競爭法，大堆熱山芋，舊老頂劉吳惠蘭因病離職，OGCIO一向唔多引人注意，審計處再考核番呢幾年OGCIO政績，肯定大開眼界。

講返Liz Tse，近期致力推動香港數據中心項目，撥地興建之餘亦叫OGCIO做吓統籌，反而仲比較似樣。香港一直唔夠數據中心用地，Liz Tse嘅工作應該兩年前開始，遲到好過無到。