會長接任資訊科技總監

上星期政府宣佈港鐵賴「會長」接任GCIO，接替未獲政府續約嘅葛輝。賴會長係最樂意與媒體打交道嘅CIO之一，而且比較率直明快，每次都有新料分享，屆時科技政策透明度日後應有所提高。傳統上，港鐵CIO都由外部招聘，會長到一月初先上任新工，港鐵應該有足夠時間招聘。

最近，雲運算會議幾乎唔停，本星期又有一個雲端計算世界論壇亞洲，主講除咗熟口熟面嘅Pacnet 行政總裁Bill Barney同馬會李惠光，亦有Adidas、Telstra、GE嘅CIO，本港係全球採購業樞紐，原因之一係IT及電訊比較完善，會議相信幾有代表性。

同場有關於CDN（內容傳送網絡）論壇。內容傳送對於國際性媒體愈來愈重要，加上唔少電訊商，好似SingTel同OBS，都計畫在本港擴展數據中心。而法國電訊OBS更加同SITA合作，响香港興建雲服務數據中心，其中CDN俾核心技術，令雲端服務可以全球化。數據中心行業從業員愈來愈多，會長响港鐵時，亦好多次提到想服務「雲端化」，供應鐵路服務俾其他鐵路公司，增加港鐵收入，甚至出租兩鐵合併後騰出嘅數據中心，好有商業頭腦。點樣推動雲端產業，可能係履任後一大任務。

今個星期HP公佈全年業績，年度盈利下跌九成一，不過已經比預期為好，其中最大原因當然係PSG個人電腦業務拖累，WebOS出師不利（撇賬三十三億美金），筆記簿受到平板打擊，銷情下跌。但Google針對筆記簿電腦嘅Chromebook亦銷情慘淡，據其中帶頭生產 Chromebook嘅宏碁施振榮話，幾個月來只售幾千部，可謂血本無歸，三星亦唔好得幾多。上星期 Google嘅老總Eric Schmidt去台灣安撫廠家，因為Android 4.0版本Ice Cream Sandwich俾咗三星率先推出，較早前Honeycomb又俾摩記獨家，台灣廠商永遠執二攤，唔少仍賣Gingerbread，故此非常不滿，Google一味叫台灣生產Chromebook，好似爛頭卒，Windows 8可能提早出籠，台灣係筆記簿最大生產地，Google亦要修補吓關係。