賭城風雲

美國賭城又到每年一度嘅CES消費電子展，內華達經濟麻麻，2006年開始賭業收入就一直下跌，佔整體收入愈來愈少；雖然酒店入住率唔曳，始終旺丁唔旺財。目前內華達賭業，佔整體收入不足四成，賭場數目亦一路減少。

好彩賭城依然有唔少大會議，年頭CES係其中之一。舊年主打係3D電視。今年CES唔少廠商趁機推英特爾以Ivy Bridge代號處理器嘅Ultrabook，號稱更輕、更薄、續航力更長，講真啲其實係一部進化版Netbook。蘋果iPad同Android平板橫掃之後，Netbook市場一夜消失於無形，如今以Ultrabook救市掂唔掂，令人懷疑。

但Android平板主要係 ARM處理器天下；高通、TI同 Nvida等三家廠商鼎足而立，加上價錢真係可以好平。平板好處係方便攜帶，起動快捷，操作方便，搜尋資料玩遊戲查地圖，甚至煲劇，記錄簡單筆記及覆貓，實在無得彈，而絕大部分人大部分時間，只係閱讀內容或消費資訊。用平板製作內容，的確無咁方便，PC唔會消失，不過重要性已經大減啫。

Intel話成立咗三億美元嘅基金，力推Ultrabook重新振興PC市場，如果唔係一廂情願，就可能自欺欺人。PC被平板或 iPad取代功能，係大勢所趨。

今年亦係咪記最後一屆參加CES。咪記嘅XBox及手機生意，真係唔值得花咁多錢，PC就留番廠商同埋英特爾繼續努力，今年Steve Ballmer最後一屆代表咪記作主題演講，佢响消費市場，係唔係已意興闌珊，且拭目以待。