虛擬化ADC漸入佳境

上星期河床第二季業績，從第一季反彈，主要係旗艦產品Steelhead及Cascade銷情理想。Stingray及儲存系統加速產品Granite新產品仍繼續努力。

香港唔少大行，已用咗Steelhead，包括旗艦嘅航空公司、銀行同埋酒店。但係業績公佈後，河床再公佈豬扒新合作協議；以七千五百萬美金，授權Stingray嘅ADC軟件，畀豬扒整合數據中心解決方案，而流動方案Junos Pulse內，加入Mobile Steelhead流動加速方案。

以上消息亦為豬扒本身嘅WX或者WCX加速方案，正式劃上咗句號。兩家公司股價反應正面。豬扒股價(NYSE: JNPR)即時彈升百分之五，而河床（NASDAQ:RVBD）一路向好，從14蚊美金，彈升至18蚊水平，大行報告紛紛唱好。

垂青Stingray唔止豬扒，另一單本港 CPCNet決定採用Stingray推出負載平衡解決方案，八月份有聯合公佈。根據CPCNet嘅大佬Daniel Kwong話，渠哋係評估咗好耐先至選咗河床，原因之一係支援虛擬化，架構好有彈性，伸縮自如，Daniel選擇技術夥伴，可以話無寶不落，好有經驗。河床亦宣佈收購後嘅第三季度，Stingray銷售額已上到二千萬美金，增長持續，就可以挑戰F5(NASDAQ:FFIV) 以硬件設備出貨嘅ADC方案。

目前，F5佔ADC嘅半壁江山，股價從五月130蚊美金樓上，累跌至最近10蚊樓下。其實，F5亦都有虛擬ADC方案，產品叫「火力」Firepower，賣成點就唔知；但係火遇水會點，大家就心知肚明，仲要成條河咁多水添喎。