高層換櫈

今年唔少高層變動，尤以電訊業較多。自從七月份Pacnet突然炒咗Bill Barney，新老頂Carl Grivner不斷換人，大幅裁員，銷售阿頭Alice Ting較早前過檔去Akamai。Pacnet以前有唔少中小企客仔，但公司改變略策，目前針對大客仔，專做數據中心，香港已有唔少投資，舊年就集中改建海底線纜上岸嘅Landing station做數據中心。

P仔就有蕭姐等高層轉職，咖喱去咗管馬會投注，馬會IT阿頭Sunny Lee亦離職，但留任至下年二月過渡，繼任人係空降嘅Ganswindt先生，曾出任德國Deutsche Telekom嘅部門 CIO，亦做過德航CIO，係唔係馬會總裁應嘉柏係德國人，搵位老鄉幫手。

最出人意表係咪記前大中華董事長Simon Leung。Simon以前做過摩記搞電話，後來過檔咪記，但離開咪記無再入 IT行，去咗教育機構哈羅。Simon唔做軟件，轉做哈羅國際服務CEO，老細則係遠東系嘅邱達強，以前渠專門做石油及中國貿易，同英國哈羅拍檔，連國際教育都做埋。

哈羅有三家學校响亞太區；包括香港、北京及曼谷，梁老總負責物色有乜地方可再開分校，服務富二代，自然好受歡迎。渠位老友兼前度咪記大中華阿頭Tim Chen，2007年離開咪記後，去咗打幾年籃球，今年底終於離開中國NBA，去咗澳洲電訊商Telstra，做亞太區阿頭，Telstra重返亞太，下年再有動作，Telstra本資擁有本港CSL，係流動一哥。