北電破產保護令

一年爾始，上星期有北電嘅活動，講佢哋推出嘅Web.alive，點樣幫聯想賣電腦，不過同一日又傳出北電申請破產保護令，以免重組受債權人干預。新年流流，又要出通告解釋，真係大吉利是。

不過北電出現問題已經唔係最近嘅事，唔駛大驚小怪。申請保護令亦唔代表會執笠，美國好多航空公司都試過，結果安然渡過。不過上年十一月申請破產保護嘅Circuit City，亦有真係倒閉咗。

曾幾何時，北電在話音交換同埋光纖（DWDM）方面，技術領先同業一度係加拿大之光。北電在IP電話同埋VPN、技術上甚至有段時間超越思科。但2004年會計醜聞後，業務一路走下坡，IP電話市場幾乎俾思科佔去半壁江山，可能係管理層應乎法律挑戰，已經疲於奔命，仲點樣做好盤生意？

講起醜聞，另一單愈炒愈大鑊係印度嘅電腦顧問Satyam，上月爆出做假賬嘅規模驚人（超過10億美金），最近又查出誇大聘用員工嘅數目，原來五萬八員工，唔少係幽靈，咁出糧嘅錢去咗邊？講呃，真係唔夠印度嚟。

年初好多IT人都出門去也，聽取新一年Kick-off，香港水盡鵝飛。今年年初嘅活動又確係唔多，HP嘅PSG二月中就在迪士尼開亞太區大會，不過今次係講遠端用戶技術（Remote Client），即係以前所講嘅薄客戶。香港某啲機構，好似英基屬下某嘅九龍小學，已經用緊類似方法，取代傳統桌上電腦。HP舊年開始，已經不斷推銷CCI技術，即係透過刀鋒伺服器取代桌面電腦。刀鋒伺服器市場的最大競爭對手I記再無做PC生意，HP就推動桌面虛擬化，以取代桌面帶動刀鋒伺服器市場。今年大手筆，再在迪士尼開騷，睇吓I記有乜對策。