電子教材知易行難

教育局與書商嘈到反面，陳副局長話對電子教材有信心。教育局又向立法會申請五千萬，畀大學及非牟利團體，開發電子書引入競爭，書商似乎又唔擔心，皆因電子教材唔易做。

電子教學好處多多，唔少學校試過推動。舊年新界北鳳溪創新小學收咗五百幾萬資助，開發電子教材，報紙話學生口碑唔錯，但教材成本無下降。鳳溪校長話電子教材好好用，拉近學習差異，究竟經驗係咪可以借鏡？不過肯定唔係間間學校，可以收咁多錢做實驗。

教科書商亦開發電子書，肯定係專家，點解唔大搞？電子教學知易行難，書商心知肚明。電子器材日新月異，電腦折舊好快趣，管理困難，正所謂擁有成本唔平，筆席一闊三大，又怕失竊濫用，學校派Netbook，學生就用嚟IM吹水，平板唔係Jailbreak就Root哂。

破解電子器材，老師多數唔係學生個皮，上堂恐怕秩序大亂。電子教學最大優點係互動，但點都唔夠飛卜咁好玩，開機就卜一卜先，仲同阿媽話做緊功課，家長又擔心學生日日對電腦，壞眼兼將來唔寫字。

外地唔少大力推動電子教育嘅學校，結果亦乏善足陳。財雄勢大如咪記，2006年中亦响美國費城搞過未來學校，當年花咗六千三百萬美金，一流嘅軟硬件，完全電子化教學，結果High Tech真係揩嘢，轉咗四位校長，學術成績麻麻。後來咪記死撐成績唔代表一切，全人教育嘛。啱嘅，標基都無讀過大學，唔駛咁緊張。

上星期去CyberWorld，見到技術顧問Raymond Ma，開發唔少Splunk，夾豬扒設備嘅監察工具，視覺效果唔錯，渠話示範畀客仔睇，唔少話有興趣。不過豬扒中人話，最近接到I記電話，要求一齊推渠哋剛收購嘅Q1 Labs。I記同豬扒係拍乸，一定幫拖，不過Q1 Labs有幾叻，就唔知嘞。