IoT種菜

上星期去零碳天地，香港通訊公佈家居智能農夫水耕種植系統，見到前EMC老頂Gabriel Leung及香港通訊主席陳重義Hubert Chan。香港通訊代理諾基亞，年底出Android版本，亦開發智能家居方案，水耕種植系統係其中一項智能家居產品。

水耕種植比較乾淨，收成期比較短，因為LED燈能廣泛應用於園藝上，再根據生長周期調校養份；LED以電流而唔用熱產生光，節省能源，早應用在汽車同家居燈飾，而最新用途就係園藝或城市農業。LED嘅UV（紫外線）相對少，對人體害處低，一般紫外線又會吸引昆蟲，用LED後會少啲昆蟲會滋生，保證衛生，LED壽命可長達五年半，藍色LED更有助食物新鮮。

原來Hubert亦係現代農夫，經常種菜。不過亦有種生果同埋香草，渠話加上大數據，可參考其他人心得，加快收成。

植物一般只吸收藍及紅色光譜，利用指定光譜可加速植物生長，減少能源消耗，室內空氣又因光合作用改善，好多家居園藝開始採用，而農用LED，連電子零件商RS Components有得賣；RS Components網站甚至教點用IoT技術，自行開發私人農場，器材全可網購，日後工廠大廈菜。RS Components力推IoT，類似應用陸續有來。

講起IoT，上月派成績表嘅京信通信（HKG:2342）宣佈，推出符合歐洲電訊標準化協會（ETSI）標準嘅流動網絡邊緣運算（MEC）技術；响流動網絡邊緣智能管理網絡流量，解決處理量不足、網絡擁塞、延遲等問題；平台係京信通信與應科院為智慧城市及物聯網（IoT）研發技術成果。

流動電話所用蜂窩網絡設計，針對服務手機，但唔可以應付智能城市和IOT衍生的數十億計連接嘅設備。加上智能手機同IOT，資料已一般儲存响雲端上，結果伺服器同流動裝置之間，距離好遠，亦搞到網絡雍塞，傳輸又慢。MEC就用NFV技術，部分運算工作移到網絡邊緣，縮短運算平台與流動裝置之間距離，減少頻寬浪費，延遲率同成本亦降低，開發IoT應用尤有幫助，IoT終端數量多，以目前電訊商嘅訂價，好難成事。京信通信股價表現唔錯，加上IoT係大趨勢，唔少流動營運商會有興趣，值得留意。