獵頭聚會

中環雲咸街開咗間酒吧叫 The Globe，外表無乜特別，不過論啤酒種類就真係乜都有，有次仲見到星爺响入面。最近香港有家獵頭公司叫S3（Security, Storage, Software），即係專門物色保安、儲存、軟件人材，經常响The Globe做Networking，上次結果迫爆玻璃，唔知係因為啲啤酒，還是派咭片搵工。

S3專門做IT獵頭，六月初又响The Globe聚會，順便收吓IT人咭片。佢哋每次都加插演講，今次嘅係搞反DDoS嘅Nexusguard，講解對付僵屍程式，講吓crimeware as a service點做生意，揭開網上湘西趕屍嘅神秘面紗。網上趕屍佬利用病毒，四圍散播僵屍程式，日常潛伏電腦內，不動聲色，其實隨時候命，上網發動DDoS攻擊，專門勒索大公司、賭場、網站之類，威脅靠網絡做生意嘅公司，每分鐘發動幾十萬次攻擊，令網站即刻癱瘓，防不勝防。Nexusguard專門做截擊DDoS，講題應該 幾有趣，但係上次因為人太多，S3話今次只招呼三十幾人，大家最好寫個電郵，俾佢哋嘅史葛隊長問吓先，卜定個位。

聽講Alice  Ong走咗之後，HP嘅IPG响新加坡調咗位外國人嚟，呢位羅拔先生以前做開消費市場，將會嚟香港打躉，以前去IPG聚會，多咗機會練英文。