Mark哥可以選總統

上期講開 HP完成收購H3C，跟住又買埋Palm，令人省記呢間PDA老祖宗仍然存在，不過都比iPAQ 似有若無要好。手機市場已經成為iPhone、Android、Nokia三分天下局面，不過Mark哥一向做開大買賣，所以有買貴無買錯，不過如果又買貴又買錯，咁就大鑊。

上星期聽位NCR跟Mark哥嘅伙記話，佢老人家只睇數字，當年曾經將N記旗下嘅Teradata起死回生，一舉成名，終於去到hp仲做埋大佬。

Mark哥不單改變hp嘅企業文化，而且要做大做強，絕不信邪，所以買EDS、3Com，同以前嘅伙伴I記同思科鍊過，而家買埋Palm，挑戰蘋果諾記，氣魄唔講得小。Mark哥可能信奉以前澳洲公司醫 生韋理一句名言，「Business never fails, Man does」。任何生意都有辦法搞掂，如果Mark哥成功，下份工應該做美國總統。

講起HP，其實網絡交換設備真係做得唔錯，就係Procurve。唔講唔知，Procurve响澳門賭場做得唔錯。澳門賭場幾乎俾Procurve壟斷，原因賭檯嘅設計經常更改，網絡設定太複雜，就一定唔會用。結果HP可以响香港亦請得起有人睇Procurve，完全拜澳門所賜。

 四月份，HP三個部門推出新產品，就到咗咪記嘅Office同埋SharePoint新版五月中出籠，亦响海港城同麥兜做Cross-over，搞「爸媽I LOVE腰」eCard設計比賽，Office同麥兜Crossover，連親情都玩埋。