IT真人Show

上星期竟然連續兩個IT大 Show，一個係「豬扒」萬豪酒店嘅Solution Day，另一個係咪記响港麗酒店嘅MIX，兩個Show都人頭湧湧。通常以前IT做示範，都係睇幻燈片，然後做個疑真疑假嘅示範。

不過今時今日，咁嘅服務態度，真係唔得。

豬扒嘅客仔主要喺做Infrastructure，一見到豬扒Sales頭Thomas Chan，即刻嗔生意難做，唔少銀行客下半年業績麻麻，紛紛咳「筆席」，好在其他依然陸續有嚟。好多拍乸依然擺檔，好似無線網絡商Trapeze嘅Samuel就話，剛剛贏咗成個杭州市嘅Wi-Fi合約，恭喜恭喜。

豬扒今次介紹JUNOS先進功能， Andy Leung介紹「可用性」，上台打真軍，只用兩部路由器同埋EX交換器駁埋一齊，就可發揮高容錯能力，佢在網絡傳送一套戲，將接線又拔又插，點樣搞法，網絡仍然唔斷，套戲依然唔停照播。

講返咪記，上星期五MIX唔再搞Powerpoint，完全以實戰案例上場，一開始仲播齣「占士邦」，用嚟介紹Aston Martin跑車，點樣利用Silverlight推銷。全場由咪記嘅Andy同埋Harris上台棟篤笑，全部真實案例示範，難得係全程無 Hang機。不過最精采請嚟香港討論區Discuss.com.hk總經理陳浩然，講吓點解會從Linux轉用Windows 2008。

唔少Internet網站都喺Linux大本營，連Discuss都肯投向「咪記」懷抱，一定有啲嘢。通常呢啲場合，上到嚟嘅CEO，都嚟客套一番，假到出汁。

最難得係真誠坦白，梁國昌第一次見Harris，真係好大疑心，佢話轉用Windows，契機係因為Datacenter唔夠用，好多新底板又無Linux驅動程式，得物無所用，Linux人又難請，結果轉用Windows 2008嘅IIS 7.0。佢哋網站都係用PHP寫，以前Windows跑PHP慢到離奇，ISAPI架構好慢。但係Windows 2008之後洗心革面，用咗公開標準嘅FastCGI技術，執行PHP快咗好多。

但梁國昌話佢第一份工做技術支援，每月負責Reboot啲Windows NT一次，穩定性之差，真係印象深刻。梁國昌負責Discuss.com.hk前，係uwants.com揸弗人，臨尾Harris窒uwants係唔係有文法錯誤，u唔係第三身，want點會有s尾。梁國昌答話呢個Domain，原本佢堂弟申請用來代理Hosting生意，原意係u want space，點知未開檔，美國間Hosting就執咗，結果個名用嚟做網上論壇，其實文法無錯，只係美麗誤會！