Randy離世

本欄介紹過嘅Carnegie Mellon大學教授Randy Pausch終於離世。不過佢在網上嘅最後課堂（the last lecture），就被數以百萬網友睇過。呢段片中Pausch從容面對死亡，睇完之後真係令人動容。

美國歷史上，能夠如此感動人心，大概只有四十年代美國棒球手盧格瑞（Lou Gehrig），此人一共連續出賽二千一百三十次，但响三十四歲英年，竟然不幸罹肌萎縮性脊髓側索硬化症，佢自知不久人世，亦相當瀟灑，繼續作賽至三十六歲，才告別球壇，三年後逝世。盧格瑞被冠以「鐵馬」之名，當日嘅告別賽，1939年在洋基球場與球迷永訣話別，更成為係美國最膾炙人口嘅一幕。

美國人為紀念呢位棒球英雄，索性將「肌萎縮性脊髓側索硬化症」命名為盧格瑞氏症（Lou Gehrig disease），不過寫《時間簡史》成名嘅劍橋天體物理教授霍金，亦患呢個病四十年，如今依然健在，真係奇跡。

講番本地，咪記以前做開PR嘅Alpha離職，佢調職做Xbox宣傳後，聽佢啲好友話，Alpha講都係唔習慣做消費產品嘅孖屐亭，都係想做返企業IT產品多啲。不過IT公關經常唔夠人，以佢經驗唔難搵份好工。

最近又聽以前HP嘅Venus Chan去咗富士施樂，本地辦公室影像產品競爭激烈，最近KM發佈i-Solution方案，連女明星陳法拉都出埋，結果娛樂記者多過IT記者好幾倍。

不過聽有啲公關慨嘆話，如今IT版位愈來愈少，可能真係要搵番多啲港聞同娛樂記者充撐吓場面。