教學技術大躍進

年初有唔少人事變動，响VMware好耐嘅Edward Yeung離開，加入軟件定義儲存廠商Nutanix，專睇中台市場，上周去咗美國報到。唔少Nutanix都用嚟安裝Citrix及VMware嘅VDI，但係VMware亦推出VSAN平台嘅EVO：Rail平台，專門針對VDI環境。Nutanix同VMware有合作，亦有競爭，但競爭關係愈來愈大，Edward知己知彼，可以幫Nutanix更快打開本地市場。

VMware嘅VDI客戶經理Monica Cheung亦離開咗，加入美國猶他州為總部嘅教育雲端平台Instructure，負責亞太區。Instructure係美國成長最快嘅教育平台，中大學，甚至大學都有採用。原來美國唔少學校發覺自編教材愈來愈多，唔少老師利用雲端平台，發放教材同練習畀學生，並加入互動功能，家長亦可即時見到學生表現。Instructure係利用雲端平台AWS嘅SaaS雲服務，旗下嘅Canvas係最受歡迎嘅教育管理平台，亦係開源軟件。

講起教學，職業訓練局VTC亦有課程，教學生用雲運算，並得到AWS資助，每位學生有一百美元免費資助。VTC亦用AWS虛擬系統畀學生做電腦實驗，熟悉雲運算嘅環境。美國唔少科技公司創業，都係用咗AWS平台，包括視頻串流公司Netfix以及天氣預測公司Weather.com，全部都用雲端運算，唔需要自資購買設備，VTC夥拍AWS，相當有眼光。今個星期VTC响將軍澳分校，向新聞界介紹用AWS嘅革新雲端電腦房，以及學生創作嘅「評分加速器」， 用大數據中數據科學同埋機器學習技術，幫助老師批改功課同監測學生表現，呢個雲端應用仲攞咗「2015 香港資訊及通訊科技獎：最佳學生發明獎」。